उमेदवारांचा जीव टांगणीला; आता २१ डिसेंबरला होणार नगरपरिषदेची मतमोजणी

उच्च न्यायालयाचा महत्वपूर्ण निर्णय; आचारसंहिता कायम

नागपूर : मुंबई उच्च न्यायालयाच्या नागपूर खंडपीठाने एक महत्वपूर्ण निर्णय देत उद्या होणारी नगरपरिषद आणि नगरपंचायतींची मतमोजणी आता २१ डिसेंबरला होणार असल्याने सर्वच उमेदवारांचा जीव टांगणीला पडला आहे. दरम्यान, मतमोजणीपर्यंत आचारसंहितेची प्रक्रिया लागू राहणार आहे.

राज्यात स्थानिक स्वराज्य संस्थांच्या निवडणुकांचा ताण-तणाव वाढत असताना, मतमोजणीच्या तारखेबाबत आता मोठा संभ्रम दूर झाला आहे. सुरूवातीला राज्य निवडणूक आयोगाने २ डिसेंबरला मतदान आणि ३ डिसेंबरला निकाल जाहीर होईल, असे सांगितले होते. मात्र काही नगरपरिषद आणि नगरपंचायतींमध्ये न्यायालयीन पेच निर्माण झाल्याने आयोगाने आपल्या कार्यक्रमात बदल करत, ज्या ठिकाणी वाद सुरू आहे, तेथे २० डिसेंबर मतदान व २१ डिसेंबरला निकाल असा नवीन आदेश देऊन परिस्थिती अधिक गुंतागुंतीची केली होती. याच पार्श्वभूमीवर आता मुंबई उच्च न्यायालयाच्या नागपूर खंडपीठाने महत्त्वाचा निर्णय दिला आहे. त्यानुसार उद्याची मतमोजणी रद्द करण्यात आली आहे. आता २१ डिसेंबरलाच सर्व ठिकाणचा निकाल जाहीर करण्यात येणार आहे. तोपर्यंत आचारसंहिता कायम राहणार आहे.