माजलगाव : तुळजापूर येथे देवीच्या दर्शनासाठी निघालेल्या माजलगाव येथील भाविकांच्या कारचा खामगाव–पंढरपूर राष्ट्रीय महामार्गावरील शिंदेवाडी फाट्यावर रविवारी भीषण अपघात झाला. अविनाश दादा बनसोडे यांच्या पेट्रोल पंपासमोर झालेल्या या दुर्घटनेत पाच जणांचा मृत्यू झाल्याची प्राथमिक माहिती आहे. मृतांमध्ये ओमकार महादेव गिरी, गजानन महादेव नामदास, माऊली गजानन नामदास, सोमनाथ बडे आणि अनिल आचार्य यांचा समावेश आहे. दरम्यान, अपघातानंतर नागरिकांनी रास्ता रोको आंदोलन सुरू केले.
तुळजापूर येथे तुळजाभवानी मातेच्या दर्शनासाठी निघालेल्या माजलगाव येथील भाविकांच्या वाहनाचा खामगाव–पंढरपूर राष्ट्रीय महामार्गावरील शिंदेवाडी फाटा येथे रविवारी भीषण अपघात झाला. अविनाश दादा बनसोडे यांच्या पेट्रोल पंपासमोर झालेल्या या दुर्घटनेत पाच जणांचा मृत्यू झाल्याची प्राथमिक माहिती समोर आली आहे. या घटनेमुळे माजलगावसह परिसरात हळहळ व्यक्त होत आहे.
मिळालेल्या माहितीनुसार, माजलगाव येथील एक कुटुंब तुळजापूर येथे देवीच्या दर्शनासाठी कारने निघाले होते. दरम्यान, शिंदेवाडी फाटा परिसरात त्यांच्या कारचा भीषण अपघात झाला. अपघाताची तीव्रता एवढी होती की, वाहनाचे मोठे नुकसान झाले. घटनेची माहिती मिळताच स्थानिक नागरिकांनी घटनास्थळी धाव घेत मदतकार्य सुरू केले.
या दुर्घटनेत ओमकार महादेव गिरी (वय २४), गजानन महादेव नामदास (वय ३८), माऊली गजानन नामदास (वय ११), सोमनाथ बडे (वय २३) आणि अनिल आचार्य (वय ४०) यांचा मृत्यू झाल्याची माहिती समोर आली आहे. मृतांची ही माहिती प्राथमिक स्वरूपाची असून अधिकृत यंत्रणेकडून अंतिम पुष्टी होणे अपेक्षित आहे.
सीसीटीव्ही फुटेजमध्ये अपघाताचे दृश्य
दरम्यान, या भीषण अपघाताचे सीसीटीव्ही फुटेज समोर आले आहे. माजलगाव डेपोची एसटी तेलगाव रस्त्यावरून माजलगावच्या दिशेने येत असताना समोरून येणारी हुंडाई आय-२० कार (एमएच २६ ए.के. ४२१०) घसरत आल्याचे सीसीटीव्ही फुटेजमध्ये दिसत असल्याची माहिती आहे. त्यानंतर दोन्ही वाहनांमध्ये भीषण अपघात झाल्याचे प्राथमिकदृष्ट्या दिसून येते. अपघात नेमका कोणत्या कारणामुळे झाला, याचा तपास सुरू आहे.
अपघातानंतर नागरिकांचा रास्ता रोको
या दुर्घटनेनंतर परिसरातील नागरिकांमध्ये संतापाचे वातावरण निर्माण झाले. पाडुरचे सरपंच लतीफ मोमीन तसेच शिंदेवाडी आणि गुजरवाडी येथील नागरिकांनी रस्त्यावर उतरून रास्ता रोको आंदोलन सुरू केल्याची माहिती आहे. त्यामुळे महामार्गावरील वाहतुकीवर परिणाम झाला. दरम्यान, अपघातात नेमकी किती वाहने सहभागी झाली, अपघाताची निश्चित कारणे काय होती आणि घटनेबाबतची अधिकृत माहिती काय आहे, याचा तपास संबंधित यंत्रणांकडून केला जात आहे.
Comment here